Qadrli o‘quvchilar! Nashriyotimiz siz azizlarga 10 jilddan tashkil topgan «Jahon bolalar adabiyoti» seriyasini taqdim etadi. Kitoblar jahon bolalar adabiyoti yozuvchi va shoirlarining ertak, hikoya, she’r va boshqa ko‘plab janrdagi asarlarni o‘z ichiga qamrab olgan. Ushbu uchinchi jildda siz Italiya, Bolgariya, Polsha, Chexiya, Slovakiya, Ruminiya, Serbiya bolalar adabiyoti bilan yaqindan tanishasiz.

Atoqli bolalar shoiri Janni Rodari shimoliy Italiyaning Olenya viloyatida 1920-yilda tug‘ilgan. Otasi nonvoy edi. Janni 9 yoshga kirganda otasi vafot etib, u ukalari Chezare va Mario bilan onasining Varesotti degan qishlog‘ida ulg‘aydi. Kichikligidan kasalmand va zaif bo‘lgan bola bu yerda musiqa va kitoblarga qiziqib qoldi.

Skripkadan dars oldi. Shu yerdagi seminariyada uch yil o‘qidi. 17 yoshidan qishloq maktablarining boshlang‘ich sinflariga dars bera boshladi. 19 yoshida Milan universitetining til-adabiyot fakultetiga o‘qishga kirdi. Ikkinchi jahon urushi boshlangan yili sog‘ligi yomon bo‘lgani uchun xizmatdan ozod qilindi. Yaqin do‘stlari urushda halok bo‘lib, ukasi Chezare konslagerga qamalgandan keyin xalqning Qarshilik Harakatiga qo‘shildi.

1948-yilda jurnalistlik qila boshladi, «Unita» gazetasida ishladi. U maktabda ishlab yurgan chog‘laridanoq bolalar uchun she’rlar mashq qilardi. Endi gazetaning bir burchagida bolalar adabiyoti uchun doimiy joy oldi. 1950-yilda Rimda «Pioner» degan maxsus bolalar jurnali tashkil qilinganda Janni Rodari unga muharrir etib tayinlandi. Shu yili uning birinchi «Quvnoq she’rlar kitobi» bosilib chiqdi…