Бугунги кунда ҳаётимизни рекламасиз тасаввур этиш қийин. Истаймизми-йўқми у онгимизга ўз таъсирини ўтказмоқда. Мазкур рисолада муаллиф халқ оммаси онгига рекламанинг, ижтимоий рекламанинг, айниқса, унинг ташқи тасвирий тарғибот йўналишининг маънавий, психологик ва дидактик таъсири хусусиятлари ҳақида фикр юритади. Бу борадаги муаммолар, амалга оширилиши лозим бўлган ишлар юзасидан ўз мулоҳазалари, таклифлари билан ўртоқлашади.
Рисола барча таълим соҳаларидаги маънавий-маърифий жабҳа мутахассислари, таълим-тарбия, тарғибот-ташвиқот масалалари билан шуғулланувчилар, ушбу масала билан қизиқувчи китобхонларга мўлжалланган.

• Сўзбоши
• Ижтимоий тарғиботнинг реклама тури ва унинг психологик ва дидактик хусусиятлари
• Кўргазмали тасвирий тарғибот миллий мафкурамиз тарғиботи тизимининг бир тармоғи
• Рекламанинг ёшлар онгига ижтимоий, мафкуравий, маънавий ва психологик таъсири
• Ижтимоий тарғибот, рекламанинг оммага психологик ва дидактик таъсири
• Ижтимоий тарғибот рекламасидаги ранглар жозибаси
• Ижтимоий тарғибот технологияси, ички мазмун ва рекламани қабул қилишнинг миллий хсусиятлари
• Маданият саройлари, маънавият хоналари ва бинолар ичидаги ижтимоий тарғибот

СЎЗБОШИ

Демократик давлат ва фуқаролик жамиятини барпо этар эканмиз, баркамол иймонни тарбиялаш, меҳр-мурувват туйғусига бой шахсни вояга етказиш энг устивор вазифалардан бири бўлиб қолади.

Шу жиҳатларни олганда, барча фуқароларимизнинг қалбида ватанга меҳр-муҳаббат ҳиссини янада кучлироқ шакллантиришнинг бугунги кун талабидаги омилларини излашимиз лозим. Чунки айни шу муаммо бугунги куннинг долзарб вазифаларидан биридир.

Маълумки, ташвиқот ва тарғиботда радио ва телевидениенинг алоҳида ўрни бор: бири эшиттирса, бири ҳам эшитгириб, ҳам кўрсатади. Аммо психологияда бу икки усул ҳам яримфаол восита саналади. Бу ўринда тарғибот ва ташвиқотда яна бир шакл борки, у ўз фаол таъсирчанлиги билан ажралиб туради. Бу ҳам бўлса ташқи тасвирий тарғибот, яъни ижтимоий рекламадир.

Бугунги кунда ҳаётимизни рекламасиз, унинг бир кўриниши, тури бўлган ташқи тасвирий тарғибот, ижтимоий рекламасиз ҳам тасаввур қилиш қийин.

Ташқи тарғибот воситалари деганда, биз, одатда, кўчалардаги замонавий полотнолар, постер, бренд, шиор ва бошқа турли хилдаги тасвир ва тарбиявий сўзлар омухталаштирилган воситаларни кўз олдимизга келтирамиз. Бу, умуман олганда, тўғри. Аммо тўлиқ эмас.

Ташқи тасвирий тарғибот воситаси сифатида чиройли қилиб безатилган бинонинг ўзи, кўркам кўча, гўзал майдон ва шунга ўхшаш объектларни ҳам айтиш мумкин.

Гўзал шаҳарнинг кўркига мос қилиб қурилган чиройли бино инсонда мана шу бинога нисбатан, қолаверса, бутун юртга нисбатан меҳр уйғотади...

...