Boqiy MIRZO (Boqimirzo Umrzoqov), 1954 yil Namangan viloyati Chortoq shahrida tug‘ilgan, Boqiy Mirzo uning adabiy taxallusi. Qo‘qon Davlat pedinstitutini tamomlagach (1975), maktabda, tuman ijroqo‘mida, O‘zbekiston Yozuvchilar uyushmasi Namangan viloyat bo‘limida, gazetalarda ishladi. Tarjimai holida o‘qituvchilik va gazetachilik katta o‘rin tutadiki, Boqiy Mirzoning ijodi pedagogikada va jurnalistikada shakllandi, qalami she’riyatda charxlandi deya olamiz. O‘zbekiston Yozuvchilar uyushmasi a’zosi Boqiy Mirzo “Yangi kun”, “Uzukdagi yoqut ko‘z”, “Ko‘ngil hiyoboni”, “Sen hammadan chiroylisan”, “Yuragimni soylarga berdim” she’riy to‘plamlari, “Qaydasan, Charos?”, “Kuygan ayol”, “Makkoraning qismati”, “Qasoskor qiz qismati”, “Saqlash kamerasidagi xanjar” qissalar va hikoyalar to‘plamlari, “Tillafurush” (3 tom), “O‘g‘rining muhabbati” (2 tom) romanlari, xotira ocherklaridan iborat “Ohu soyasida bir lahza”, “Yurt bo‘ylagan odamlar”, “Kiprikdagi marvarid” trilogiyasi, “Ko‘zlaringni sog‘indim” (2 kitob), “Qimorga tikilgan qiz”, “Xazina egasining qotili” romanlarining muallifi hisoblanadi.