Mualliflar

Rauf PARFI 1943 yil 27 sentyabrda Toshkent viloyati Sho‘ralisoy qishlog‘ida tug‘ilgan. Uning ilk she’ri 1957 yilda bosilgan. Keyinroq «Sharq yulduzi»da e’lon qilingan she’rlari uni mashhur qilib yuboradi. R. Parfi o‘tgan asrning 60-70-yillarida har bir chiqishi muxlislar yuragida hayrat va olqish uyg‘otgan shoirlar E.Vohidov va A. Oripovlar safidan o‘rin oldi. Uning «Karvon yo‘li», «Aks sado», «Ko‘zgu», «Sabr daraxti» singari she’riy to‘plamlari o‘zbek she’riyatiga yangi ohang va yangi mazmun olib kirdi. Rauf Parfi satrlari dilbar samimiyat va mashrabona falsafiy tuyg‘ular bilan yo‘g‘rilgan bo‘lib, ularda jahon she’riyatidagi yangi qirralar jilvalanadi. Shoir she’rlari bir necha tillarga o‘girilgan. Ayni chog‘da o‘zi ham jahon shoirlaridan tarjimalar qilib, o‘zbek she’riyatini boyitdi. Rauf Parfi 2005 yili 28 martda vafot etgan.

Abu Parda 1959 yili Surxondaryo viloyatining Oltinsoy tumanidagi Mo‘minqul qishlog‘ida tug‘ilgan. “Yurt haqida qo‘shiqlar”, “Boychechaklar ochilar hali” va boshqa she’riy to‘plamlar muallifi.

Pardaev Abduhamid 1958 yilning 17 yanvar kuni Toshkent viloyati, Bo‘ka tumanida tug‘ilgan. Jurnalist, shoir, adabiyotshunos, tarjimon. Bir necha she’riy to‘plamlari, “Do‘stnoma” dostoni nashr qilingan. Yusuf Xos Hojibning “Qutadg‘u bilig” dostoni, Alisher Navoiyning barcha dostonlarini zamonaviy o‘zbek tiliga tabdil qilgan. F. Nitshening “Zardusht nidosi” asarini o‘zbek tiliga she’riy o‘girgan. R.Tagor, J.Bayron, J. Kits, A.Blok, I.Brodskiy kabi o‘nlab mashhur shoirlarning she’riy turkumlarini, shuningdek qator jahon adiblarining romanlari va qissalarini, taniqli faylasuflarning risolalarini o‘zbek tiliga tarjima qilgan. Toshkent shahrida yashaydi.