Mualliflar

Xanifa Solixova 1939 yilda Sharqiy gulistonning Gulja shahrida tug‘ilgan. 1967 yilda Andijon davlat pedagogika institutini tamomlagan. Xanifa Solihovaning 1960 yil o‘rtalarida Respublikamiz va Olmaota gazeta va jurnallarida, radio va televidenielarida uning o‘zbek va uyg‘ur tillarida yozgan she’rlari chop etilib jamoatchilik diqqatini tortdi. 1971 yili “Sevgi sirlari”, 1975 yili “Diyorga ta’zim”, 1977 yili “Murodim”, 1979 yili “Quyoshni sevaman”, 1989 yili “Yulduzlar kulganda” kabi kitoblari uyg‘ur va o‘zbek tillarida nashr etildi. 1978 yili “Molodaya gvardiya” nashriyotida “Gul uygurskogo bubna”, 1979 yili “Vetvi chinara” nomli to‘plamlarda she’rlari rus tilida nashr etilgan. Turkiyada nashr etilgan “Uyg‘ur adabiyotining antologiyasi”dan ham she’rlari o‘rin olgan. H.Solihovaning 1999 yildagi “Quyosh malikasi”, 2000 yilda esa G‘afur G‘ulom nomidagi adabiyot va san’at nashriyotida “Kamalak visoli” she’rlar to‘plamlari nashr etildi. 1977 yili “XX asr o‘zbek adabiyotida demokratik adabiyot an’analari” mavzusida nomzodlik dissertasiyasini, 1995 yili O‘zbekiston Fanlar akademiyasi Navoiy nomidagi adabiyot ilmiy tadqiqot institutida “Uyg‘ur dostonchiligi va nasr taraqqiyotida Alisher Navoiy “Xamsa”sining o‘rni” mavzusida doktorlik dissertasiyasini himoya qildi. Uning 1986 yili “Ozodlik romantikasi va realistik tasvir”, 1987 yili “Hurriyat kuychisi” monografiyalari nashr etilgan. Pedagogika fanlari nomzodi, professor. 2000 yilda "Do‘stlik" ordeni bilan mukofotlangan.

Нафиса Содиқова – тарих фанлари доктори, профессор. 1930 йили Тошкент шаҳрида таваллуд топган. Н. Содиқова 200 дан ортиқ илмий асарлар муаллифи. Булар Ўзбекистон тарихи ва музейшунослик, ўзбек миллий кийимларига оид монография, рисола, илмий каталог, методик қўлланма, альбом ва оммабоп асарларни ўз ичига олади. У кўп йиллар музейшунослик соҳасида қалам тебратиб, шу соҳа бўйича кенг жамоатчилик ва мутахассислар орасида ном қозонган. Муаллиф кўп йиллик самарали илмий хизматлари ва жамоатчилик соҳасидаги фаолиятлари учун «Меҳнат шуҳрати» ордени ва «Ўзбекистонда хизмат кўрсатган маданият ходими» фахрий унвони билан такдирланган.