Мазкур монография онтогенез психологияси муаммосига бағишланган бўлиб, унда психология фанида олиб борилган назарий-экспериментал тадқиқот натижалари таҳлил қилинган ва умумлаштирилган. Монографияда ушбу йўналишнинг мақсади, вазифалари, аҳамияти, принциплари, механизмлари, қонуниятлари, методологияси ва феноменологияси тўғрисида мукаммал мулоҳазалар билдирилган. Соҳага доир узоқ ва яқин хориж мамлакатлари психологларининг назариялари, ёндашувлари талқин қилинган, ўзига хос жиҳатлари алоҳида ажратиб кўрсатилган. Монография бир неча қисмдан иборат бўлиб, унда онтогенез психологиясининг ривожланиш босқичлари, мактабгача ёшдаги болалар психологияси, кичик мактаб ёшидаги ўқувчиларнинг психологик хусусиятлари, ўсмирлар психологияси, илк ўспиринлик ёшининг психологик хусусиятлари, ўспиринлик даврининг ўзига хослиги, етуклик даври муаммолари, кексалик психологияси (психогеронтология) юзасидан фикр, мулоҳаза, мушоҳада баён қилинади. Шунингдек, инсон шахси камолотини аниқловчи методикалар, тестлар, методлар изчил равишда, иерархик тарзда жойлаштирилган. Монография психологлар, социологлар ва педагогларга мўлжалланган.