Туризм соҳаси ривожланаётган мамлакатлар учун бандлик, валюта ва солиқ тушумларининг асосий манбаи ҳисобланади. Ривожланаётган мамлакатларда туристик даромадларнинг валюта оқими хорижий донорлардан олинадиган барча ёрдам оқимларидан анча катта. “World Travel & Tourism Council” маълумотларига кўра, саёҳат ва туризм учун сарфланган ҳар бир доллар уч доллардан ортиқ иқтисодий даромад келтиради. Дунё бўйлаб ушбу соҳада 100 миллиондан ортиқ ишчи ишлайди, юқори сифатли меҳмонхоналар бюджет меҳмонхоналаридан икки баробар кўп иш ўринлари яратади. ЖСТ томонидан сайёҳлар сони 2020 йилга бориб йилига 1,6 млрд. кишига кўпайиши, бу эса халқаро туризмдан нақд пул тушуми 2020 йилга бориб 2 трлн. АҚШ долларидан ортишига олиб келиши прогноз қилинган бўлса, бугунги кунга келиб, жаҳон туристик хизматлар бозоридаги вазият салбий тус олиши аниқ бўлиб қолди.

Ҳозирги кунда туризмни ривожлантириш, соҳага инвестициялар жалб этиш, кадрлар салоҳиятини ошириш долзарб вазифа ҳисобла-нади. Республикада туризм кўпинча қадимий шаҳарлар, тарихий-маданий ёдгорликлар доирасида чекланиб қолмоқда. Мамлакатнинг бетакрор табиати, миллий қўриқхоналари, тоғли ҳудудларида туризмни ривожлантириш учун катта салоҳият мавжуд. Айниқса, тиббиёт туризми, зиёрат туризми ва экотуризмни ривожлантириш нафақат иқтисодиёт, балки ижтимоий соҳалар ривожига ҳам катта туртки беради.

Бугунги кунда жаҳонда туризм соҳасини янада ривожлантириш, унинг макроиқтисодий кўрсаткичларидаги улушини ошириш, мамлакат ҳудудларида аҳолини янги иш ўринлари билан таъминлаш мақсадида туристик-рекреация объектларидан фойдаланиш механизмларини такомиллаштиришга асос яратадиган илмий тадқиқотларга эҳтиёж ортиб бормоқда. Шу жиҳатдан мазкур илмий-тадқиқот ишида мамлакатимизда туристик хизматлар бозорини ривожлантириш муаммолари ва истиқболлари таҳлил қилинган.