• Баланд учган самолёт
• Сулаймоннинг узуги
• Шундай кун
• Никоҳ узуги
• Қуёшли кун
• Чол ва бола
• Омонгул (қисса)

БАЛАНД УЧГАН САМОЛЁТ

Офтобда исиниб ўтирадиган пайтлар...

Ёмғирда бўёқлари кўчиб кетган скаменкада, касалхона кийимида тўрт-беш қиз оёғини осилтирганича ўтирибди. Насибанинг юзида ташвиш. Сариқ сепкилли қизнинг гапини бепарво тинглайди. Хаёли аллақайларда.

Самолёт ҳаммаёқни зириллатиб шундоққина том тепасидан учиб ўтди. Шу самолётда қишлоқ бир соатлик йўл-а, шу маҳалда онаси нима қилаётган экан, ўйлади қиз. Қишлоқни қўмсади.

— ...кейин-де, вуй, аптинг қурсин, ман сани тенгинг бўлдимми, дебди опам, ҳалиги қилтаноқдай болага. Тўғри-да, бошига урадими, қари онаси-ю, ивринди каталакдай уйини... Бунинг устига ҳатто машинаси ҳам йўқ...— жаги тинмасди сепкилли қизнинг.

Насибанинг баданида бир нарса юргандай бўлди. Касалинн эслади, пешонаси тиришди. Касал бўлмаса қандай яхши эди, сумкасини қўлтиқлаб беғам, беташвиш юрганди студентликнинг гаштини сури-иб...

Қия очиқ темир дарвозанинг кичкина эшигидан ҳар қўлида битта тўрхалта кўтарган паканагина семиз хотин ҳарсиллаб кирди. Эрталабдан бери, “адам академияда ишлайдила, онам заведушийлар” деб чакак ураётган сепкилли қиз хотиннинг истиқболига чопиб кетди. Сўнг она-бола етаклашиб...