Инсон икки нарсани – Ватанни ва ота-онани танлаш хуқуқига эга эмас. Бир Ватан ва халққа мансублик эса кишига умр бўйи масъулият юклаб бораверади. Ҳар иккисини ҳар қандай ёвуз кучлардан ҳимоя қилиш – шу Ватан фарзанди, шу халқ вакили бўлган ҳар бир йигит учун муқаддас бурч, шарафли вазифадир.

Мазкур рисоладан Ватанимиз сарҳадларига ёвуз ниятда суқилиб кирмоқчи бўлган халқаро террорчи газандаларга қарши мардларча курашган, сўнгги томчи қони қолгунича Ватани, халқи ва ҳарбий қасамёдига содиқ қолиб, Ватанимиз мустақиллигининг ҳимояси йўлида жон фидо этган ҳарбий хизматчилар, уларнинг қаҳрамонликлари, улар ҳақида ота-оналари, қариндошлари, сафдошлари ва дўстлари хотиралари ўрин олган.

Ундан «Ватан фидойи фарзандларини унутмайди!» шиори остида мустақиллик йилларида хизмат бурчини бажариш вақтида ҳалок бўлган ҳарбий хизматчиларни хотирлаш мақсадида ўтказилаётган тадбирларда, шунингдек ўқув-тарбиявий жараёнларда фойдаланиш мумкин. Ушбу рисола ёшларнинг мустақилликнинг қадр-қимматини моҳиятан англаб етишларига хизмат қилади, деган умиддамиз.