Ушбу фантастик асарлардаги қизиқарли воқеалар тасвири, чуқур фалсафий мушоҳада, кенг кўламдаги билимлар уйғунлиги ва кутилмаган ғаройиб ҳулосалар ўқувчини ҳайратга солади. Ҳусан Турсунов инсоният цивилизацияси олдидаги муаммоларга нафақат адиб, балки олим ва ихтирочи сифатида ёндошади, уларни келтириб чиқарувчи сабабларни изчил таҳлил қилади ва курраи заминимизга таҳдид солаётган офатларни инсонларнинг ўзлари дунёга келтираётганларини ҳар томонлама асослаб беради. Адибнинг огоҳлантиришларига қулоқ тутиб, атрофимизга ва бизни дунёга келтириб, боқаётган заҳматкаш курраи заминимизга бир назар ташлайлик. Балки давримиз олимларининг бошоғриғига айланган муаммолар: иқлим ўзгаришлари, озон қатламининг емирилиши, тўфонлар, бири-биридан даҳшатлироқ юқумли касалликлар... буларнинг келиб чиқишига ҳақиқатан ҳам ўзимиз айбдор эмасмикинмиз? Балки бу фалокатларнинг олдини олиш учун ҳали ҳам кеч эмасдир? Замондошларига замонавий муаммолар ҳақида сўзловчи адибнинг асарларида бу саволларга жавоб топасиз... Ҳикоя қаҳрамонларининг кечинмалари, ҳис-туйғулари эса ўқувчиларда Ватанга муҳаббат, пок севгига интилиш, она заминимизнинг тақдири учун масъул бўлишдек чин инсоний фазилатларни шакллантиради, маънавий дунёларини бойитади.