Dunyoning barcha xalqlari kabi olmon xalqi ham o‘zining betakror milliy o‘ziga xos afsonalari, «Nibelunglar qo‘shig‘i», «Hildebrand qo‘shig‘i» kabi xalq dostonlari, «Minnezang» kabi xalq qo‘shiqlari va minglab xalq ertaklariga ega. Ushbu to‘plamda jamlangan olmon xalq ertaklari ilk bor 1991-yilda «Yetti oqqush. Olmon xalq ertaklari nomi bilan «Cho‘lpon» nashriyotida 150000 nusxada chop etilib, unda Bexshtayn, Vossidlo, aka-uka Grimmlar, Muzeus kabi ertakchilar to‘plagan xalq ertaklari o‘zbek kitobxonlariga ilk bor taqdim etilgan edi.

O‘tgan 25 yil ichida mamlakatimizda ularga nisbatan qiziqish tobora ortib bordi, chunki ularda o‘zbeklarga yaxshi tanish bo‘lgan olmon xalqining orzu-havaslari, milliy urf-odatlari va ajoyib qahramonlari hayoti o‘ziga xos tarzda yorqin obrazlarda gavdalantirilgan edi. Shu sababdan  ushbu «Yettiyulduz» nomli to‘plamda olmon xalq ertaklarining eng qiziqarlilari nashr etilmoqda. O‘zgacha uslubga ega bo‘lgan aka-uka Grimm ertaklari esa alohida to‘plamda chop etilishi rejalashtirilgan. Umid qilamizki, bu ertaklar o‘zining ko‘p sonli ertaksevarlarining yangi avlodiga ham manzur  bo‘ladi.