Воҳидов Шодмон Ҳусейнович, 1961 йили 19 декабрь Панжакент шаҳри (Тожикистон) да таваллуд топган. Тожикистон давлат университети, тарих факультетини битирган. 1984 йилдан Тошкентда яшайди. Тарих фанлари доктори, профессор. Манбашунос, тарихчи ва таржимон. Араб ёзувидаги қўлёзмалар ўрганилиши бўйича мутахассис. Бир қанча халқаро конференция ва илмий анжуманлар иштирокчиси. Ҳозирда Абу Райҳон Беруний номидаги Тошкент давлат техника университети ва Тошкент давлат шарқшунослик институтида дарс беради. Унинг раҳбарлигида олти нафар тадқиқотчи номзодлик рисолаларини ҳимоя этган.
Асарлари Ўрта Осиё халқлари тарихи ва мданиятига доир. Қўқон ва Хива хонликлари ҳамда Бухоро амирлигида тарихнавислик мактабларининг вакиллари асарларини ўрганади. “Тарихий мерос” (ўзбек ва рус тилларида), “Китоблар, кутубхоналар, каталоглар” (ўзбек ва рус тилларида), “Ўзбекистон тарихи араб ёзувидаги манбаларда” (ўзбек, рус ва инглиз) илмий туркумларнинг муаллифи. Шу туркумларда 20 дан ортиқ асарларни таржима этиб, тадқиқот ва изоҳлар билан чоп эттирган. 30 га яқин турли тиллардаги китоблар, монография, рисолалар, 100 дан ортиқ илмий мақолалар муаллифи.