Авторы

Матназар Абдулҳаким (Матназар Абдулҳакимов) 1948 йилнинг 20 февралида Урганч туманидаги Қоровул қишлоғида туғилган. 1972 йилда Россия Федерациясининг Таганрог шаҳридаги педагогика институтини битирган. Шундан сўнг Урганч туман рўзномасида бўлим мудири, қишлоқ мактабида ўқитувчи, 1982-1997 йилларда Ўзбекистон Ёзувчилар уюшмаси вилоят бўлимида адабий маслаҳатчи бўлиб хизмат қилган. 1997 йилдан Хоразм Маъмун академиясида илмий ходим бўлиб ишлаган. Биринчи китоби "Тиниқ тонглар" 1984 йилда Ғафур Ғулом нашриётида чоп этилган. Шундан кейин "Фасллар қўшиғи", "Қор қўшиғи", "Мавж", "Ёнимдаги дарёлар", "Қорачиқдаги дунё", "Ойдинлик", "Бир қучоқ гул", "Ёлғиз япроқ" каби шеърий, "Иймон туҳфаси", "Ялдони ёритган нур", "Иккинчи муаллим сабоқлари" каби илмий ҳамда Шайх Нажмиддин Кубро, Шайх Маждиддин Бағдодий, Пахлавон Махмуд, Мирзо Абдулқодир Бедилдан таржима, "Жавзо ташрифи", "Азизлар анжумани" китоблари нашрдан чиққан. Ўзбекистон Республикасида хизмат кўрсатган маданият ходими, "Офарин" мукофоти соҳиби.

Манзар АБДУЛХАЙР – 1964 йил 25 апрелда Қашқадарё вилоятининг Шаҳрисабз туманида туғилган. Тошкент давлат университетини (ҳозирги ЎзМУ) тамомлаган. ”Минг бир сўз”, “Эски ўзбек ёзуви”, “Навоий мероси – сўз махзани”, “Соҳил оҳанглари”, “Навоий асарларида сўз ва иборалар”, “Мовий уфқ”, “Сўз руҳи”, “Тааммул”, “Навоий асарларининг изоҳли луғати”, “Боғатдаги қуш”, “Таҳририят ва бир тун” каби ҳикоя, илмий-адабий ва шеърий китоблари чоп этилган. Шунингдек, матбуотда юздан ортиқ публицистик мақолалари ҳамда Алишер Навоий Ҳазратлари ғазалларининг шарҳларига бағишланган ишлари эълон қилинган. У айни пайтда “Янги аср авлоди” нашриётида муҳаррир бўлиб ишлайди.