Mustaqillik yillarida uzluksiz ta’lim tizimi muassasalarida o‘qitiladigan barcha musiqa fanlari mazmuni ham milliy istiqlol g‘oyasi asoslari negizida qaytadan shakllantirildi. Bo‘lajak musiqa o‘qituvchilarini tayyorlashda o‘zbek xalqining boy musiqiy merosini, asrlar osha sayqal topib kelgan mumtoz asarlarni izchillik bilan o‘rganish va ularning badiiy ruhiyatidan foydalangan holda yuksak badiiy didni shakllantirish muhim ahamiyatga molik masaladir. Bo‘lajak musiqa o‘qituvchilari o‘sib kelayotgan yosh avlodni o‘zbek mumtoz musiqasi bilan tanishtirish, ularda ilgari surilgan g‘oyalar bilan tanishtirish asosida ularning nafosat hissi va badiiy-musiqiy tushunchalarga ega bo‘lishida muhim rol o‘ynovchi shaxslar sanaladilar. Shu sababli oliy ta’lim jarayonida ularning chuqur musiqiy bilimlarga ega bo‘lishlari uchun zarur shart-sharoitlarni yaratib berish talab etiladi. Ta’lim jarayonida bo‘lajak musiqa o‘qituvchilarining o‘zbek mumtoz musiqasi namunalari – maqomlar va mumtoz ashulalar bilan yaqindan tanishishlari, shuningdek, milliy cholg‘u sozlari (xususan, g‘ijjak va rubob)da ijro eta olish ko‘nikma va malakalarini o‘zlashtirishlari ularda badiiy didni boyitishga imkon beradi. Mazkur metodik qo‘llanmada o‘zbek mumtoz musiqasi vositasida bo‘lajak musiqa o‘qituvchilarining badiiy didini shakllantirishga yo‘naltirilgan pedagogik faoliyat mazmuni ochib beriladi.