Атоқли адабиётшунос олим ва драматург Иззат Султон ўзининг илмий ва бадиий асарлари билан ҳам ўзбек адабиётшунослиги, ҳам замонавий ўзбек адабиёти равнақига катта ҳисса қўшган. Бадиий ижод табиати ва адабий жанрларнинг ўзига хос нозик жиҳатларини мукаммал ўрганган олим 1941 йилдан бошлаб драматургия соҳасида ҳам қалам тебратаб, шоир Уйғун билан ҳамкорликда яратган ва 1945 йили ўзбек театри саҳнасида илк бор намойиш этилиб, ўзбек халқини буюк инсонпарвар шоир ва давлат арбобининг ҳаёти билан таништирган «Алишер Навоий» драмаси ҳозирга қадар Ўзбекистон театрлари репертуарларини безаб келмокда.

Олим кейинчалик Алишер Навоий ва у яшаган давр тарихи билан қизиқиб, бир неча насрий асарларни ёзишга киришди. Афсуски, у шундай асарлардан бири – буюк Навоий руҳи порлаб турган «Муқаддима» романини тугатиб улгурмади. Аммо, ўйлаймизки, китобхонлар машҳур адиб ва олим Иззат Султоннинг бу тугалланмаган романини ҳам катта қизиқиш билан кутиб оладилар.