Абдулла Боқий 1978 йилнинг 15 апрелида Чортоқ шаҳрида, оддий ишчи оиласида таваллуд топган. Ўрта мактабни тамомлаб, Чортоқ ҳунар-техника билим юртининг ҳисобчилик йўналишида 3 йил таҳсил олган Абдулбоқи олий ўқув юртига кириш учун Тошкентга йўл олади. Кетма-кет муваффақиятсиз кечган имтиҳонлардан сўнг қадди букилмади. Шеърсиз, ижодсиз ҳаётини тасаввур қилолмагани учун мақсадга етишга имконият қидирди. «Кўнгил кўчалари» газетасига ишга киради. Аввал реклама агенти, кейинроқ дизайнер, сўнгра масъул котиб лавозимларида ишлайди. Кейинчалик «Аёл қалби» газетаси таҳририятида дизайнер ҳамда масъул котиб лавозимида фаолиятини давом эттиради. Йиллар ўтиб, Олий хўжалик суди Ахборотномасида дизайнерлик қилган Абдулбоқи кейинчалик бош муҳаррир ёрдамчиси сифатида хизматини давом эттиради. «Ҳуқуқ ва бурч» журнали таҳририятидаги фаолияти ижодий ўсишига ёрдам берди. Сўнг «Интеллект» газетаси таҳририятида бош муҳаррир ўринбосари лавозимида ишлаган. 2018-йилда «Кечиккан баҳорим» ва «Мўъжазгина мўъжиза» китоблари нашр этилган.