ЭЛЧИН Илёс ўғли Афандиев, 1943 йил 13 майда Боку шаҳрида XX аср Озарбайжон адабиётининг улкан намояндаларидан бири. Озарбайжон халқ ёзувчиси Илёс Афандиев хонадонида таваллуд топган. Болалиги адабий муҳит ичида, китоблар оламида кечди. Бир томондан миллий адабиёт, халқ оғзаки ижоди, иккинчи томондан эса жаҳон адабиёти Элчиннинг доимий мутолаа этадиган асарларига айланди.
Унинг илк ҳикояси 16 ёшида, 1959 йилда “Озарбайжон ёшлари" газетасида эълон қилинди. Боку шаҳрида ўрта мактабни (1960), Боку Давлат университетининг филология факультетини (1965), Озарбайжон Фанлар Академияси Низомий номидаги Адабиёт институтининг адабиёт назарияси бўйича аспирантурасини (1968) битириб, “Озарбайжон бадиий насри адабий танқидда" мавзусидаги номзодлик, “Адабиётда тарихийлик ва замонавийлик муаммоси" мавзусидаги докторлик диссертацияларини ҳимоя қилди.
1965 йилда “Минг кечадан бири” номли илк ҳикоялар тўплами чоп этилди. Шундан сўнг Элчиннинг турли хорижий тилларда юзга яқин китоблари нашр қилинди. Унинг асарлари инглиз, рус, немис, испан, турк, венгер, болгар, араб, форс, чех, словак, поляк, хорват, грузин, литва, молдован, туркман, ўзбек, қозоқ, тожик, серб ва бошқа тилларга таржима этилган. Китобларининг умумий адади беш миллиондан ошиб кетади.