Шарқ ширинликлари неча минг йиллардан бери ўз мазаси ва тайёрланиш анъанасини йўқотмаган ҳолда кишилар учун ҳамон энг севимли таомлар сафидан урин олиб келаяпти. Кўпчилик негадир бу ширинликларни истеъмол қилаётганда уларни тайёрлаш жуда қийин ва мураккаб бўлса керак деб ўйлайди. Шунинг учун асосан қандолатпазлар томонидан тайёрланганини харид қилишади. Аслида эса уларни уй шароитида ҳам осонгина тайёрлаш мумкин. Бунинг учун сизга қўлингиздаги ушбу қўлланма яқиндан ёрдам беради. Унда Шарқ қандолатпазларининг кўпчиликка маълум бўлмаган "кичик сирлари" акс этади. Ушбу китобни ўқиганингизда, аминмизки, бу ажойиб десертларни тайёрлаб кўришга қизиқиб қоласиз ва ошхонага йўл оласиз. Чунки Шарқда нафақат таом, балки бошқа барча нарсаларнинг ўзига хослиги ва сеҳри бор. Шу омил бутун дунё кишиларида Шарққа нисбатан жуда кучли қизиқиш уйғота олган.

"Шарқона ширинликлар" китоби уй бекалари, қандолатпазлар, ширинликларни севиб истеъмол қилувчилар ҳамда пишириқ тайёрлашни ўргатувчи махсус курс ўқитувчилари учун мўлжалланган.