Туркистон дунё маданиятининг бешиги, бу ўлкадаги инсонларнинг она ватани, шу боис ҳам мустақиллик даврининг илк йилларидаёқ Туркистон умумий уйимиз шиори жаранглади. Ўтган аср бўйи жадидлар, ватанпарварлар Туркистон истиқлоли учун кураш олиб борган. Натижада Туркистон мухторияти, Бухоро халқ жумҳурияти каби миллий давлатлар қурилган. Улар шўролар томонидан ағдарилган бўлса ҳам, ҳурриятга интилиш юртимизда сўнмаган. Туркистон озодлиги учун кураш давом этган. Бу қутлуғ ишга ўтган асрда турли сабаблар билан хорижга чиқиб кетган юртдошларимиз ҳам қатнашган...

Китобда ўзбек, рус, турк, инглиз, француз, форс, озарбайжон, татар, гуржи, украин, поляк ва бошқа тиллардаги манбалардан, айниқса, Мустафо Чўқай, Усмон Хўжа, Закий Валидий ва бошқа тарихий шахсларнинг мактубларидан, китобларидан, журналларидан, архивлардан муаллиф жуда унумли фойдаланган. Асар тарихимизни, ўтмишдаги ижтимоий ҳаётимизни ўрганиисда, ёшларнинг ватанпарвар ва миллатпарвар бўлиб етишувларида хизмат қилади, деб ўйлаймиз.

Бу асарни қисман ё тўла интернет саҳифаларига қўйиб фойдаланиш, асардаги архив ҳужжатлари, хатлар, расмлардан ёзма рухсатсиз кўчирма олиш муаллифлик қонунларига кўра ман этилади.