Ушбу китоб ҳар бир инсон ҳаётида муҳим мавзулардан бири – Оила ҳамда унинг устуни бўлмиш эркак ва аёл табиатининг бетакрор қирралари, бир-бирига ўхшамас руҳий оламини англаш, тушуниш масалаларига бағишланган. Муаллиф ҳаётий мисоллар орқали оилавий муносабатларда Шарқ ва Ғарб маданиятларининг моҳиятини очиб беришга ҳаракат қилган.

Чорраҳада светофор ўрнатилмаган бўлса, ҳайдовчилар учун анча-мунча муаммолар туғилиши мумкиндек туюлади. Лекин бундай муаммолар пайдо бўлмаслиги учун “Йўл ҳаракати қоидалари”да жуда оддий тартиб белгилаб қўйил- ган: иккинчи даражали йўлдан келаётган транспорт воситаси асосий йўлдан келаётганига йўл бериши шарт. Демак, ҳайдовчилар учун ўрнатилган ягона қоидага ҳамма бирдек риоя қилса, бас: қарабсизки, барча муаммо ва кўнгилсиз- ликлардан халос бўламиз.

Худди шу каби одамларнинг ўзаро муносабатларини тартибга солувчи маълум тартиб-қоида ўрнатилмаган соҳанинг ўзи йўқ. Шунчаки, уларнинг айримлари қонун ва меъёрий ҳужжатларда акс эттирилмаган. Масалан, эр-хотин, қайнона-келин, ака-ука, амма-хола ва ҳоказолар орасидаги ўзаро муносабатларни қонунларда батафсил акс эттиришнинг иложи йўқ. Бундай ҳолларда ота боболаримизнинг “ижод” маҳсулидан фойдаланишимизга тўғри келади.