Холмўминов Жаъфар Муҳаммадиевич (Жаъфар Муҳаммад Термизий) 1968 йили 20 сентябрда Сурхондарё вилоятида туғилган. Ўрта маълумотни Музработ ва Бойсун туманларида олган. 1993 йилда ТДУ филология факултетининг форс-тожик адабиёти бўлимини тугатган. 1999-2002 йилларда Ўзбекистон Республикаси Президенти ҳузуридаги Давлат ва жамият қурилиши Академиясининг кундузги аспирантурасида (“Диншунослик” мутахассислиги бўйича) таҳсил олган.
Ўзбек ва форс-тожик тилларида ижод қилувчи зуллисонайн шоир, таржимон, публицист, диншунос, файласуф ва адабиётшунос олим – Жаъфар Холмўминов фалсафа фанлари номзоди (фалсафа фанлари доктори PH.D), Ўзбекистон Ёзувчилар уюшмаси аъзоси, Antyqe World Халқаро Фанлар Академияси профессори. У айни пайтда Алишер Навоий номидаги Тошкент давлат ўзбек тили ва адабиёти университетининг “Ижтимоий-гуманитар фанлар” кафедраси катта ўқитувчиси, Ўзбекистон Тожик миллий маданий маркази раиси сифати фаолият олиб бормоқда.
Шу пайтгача Жаъфар Муҳаммаднинг “Ёмғирнинг кўзи”, “Қуёш киприклари”, “Рангнинг яшил чиқиши”, “Тажаллий”, “Кўзгу ҳайрати”, “Ишқ ошиғи”, “Қуёш сийрати”, “Ғазал ғизоли”, “Вақт таъми” номли шеърий тўпламлари ҳамда “Ҳануз ишқ...” номли сайланмаси ўзбек ва форс-тожик тилларида нашр этилган. Янги давр ўзбек шеърияти намояндалари ижодидан намуналарни форс-тожик тилига, мумтоз ва замонавий форс-тожик шеъриятининг 50 га яқин намояндалари шеъриятидан намуналарни ўзбек китобхонлари учун таржима қилган.
Фалсафа, диншунослик, тасаввуф фалсафаси, миллий маънавият ва адабиётшуносликка оид бир қатор монография ва рисолалар, 300 га яқин илмий ва илмий-оммабоп мақолалар муаллифи.