Jo‘raqulov Uzoq Haydarovich 1967 yilning 1 yanvarida Qashqadaryo viloyati Kasbi tumaniga qarashli Maymanoq qishlog‘ida tug‘ilgan. 1974 – 1984 yillarda o‘rta maktabda o‘qigan. 1985 – 1987 yillar orasida Germaniya (oldingi Germaniya demokratik Respublikasi)da harbiy xizmatda bo‘lgan.Mirzo Ulug‘bek nomidagi O‘zbekiston Milliy universitetining o‘zbek filologiyasi fakulteti bo‘limida o‘qib, 1994 yili uni tamomlagan. 1997 yilga qadar O‘zMU aspiranturasida tahsil olgan. 1998 yilda o‘zbek filologiyasi fakulteti “Milliy uyg‘onish davri o‘zbek adabiyoti” kafedrasida ilmiy xodim lavozimida faoliyat boshlab, professor Begali Qosimov rahbarligida “Fitratning tadqiqotchilik mahorati” mavzuidagi nomzodlik dissertasiyasini yoqlagan, so‘ngra “Alisher Navoiy “Hamsa”sida xronotop poetikasi” yo‘nalishiga bag‘ishlangan doktorlik dissertasiyasi ustida ishlagan.Uning “Fitratning tadqiqotchilik mahorati” (2004 yil), “Hududsiz jilva” (2006 yil) to‘plami, yapon yozuvchilari novellalarini o‘z ichiga olgan “Yuzini yo‘qotgan odam” (2008 yil) tarjima kitoblari chop etilgan.