Yosh ijodkor Nazirjon Toshtemirovning misralarida samimiyat bor. Uning yozganlarini o‘qib, shunga amin bo‘lasiz. Zero, samimiyat, shavq-zavq ijodkorga ilhom baxsh etadi. Yuksak orzular esa nurli manzillar sari yetaklaydi. Buning hosilasi o‘zining rango-rang kamalagiga ega bo‘lish, ajib dunyoni kashf etishdir. Umidli qalamkash Nazirjon Toshtemirov ijodidan bahra oling, azizlar.

• VATAN
• Vatan boshlanadi ostonalardan,
• Vatan yuraklardan boshlanar asli.
• Ozod-obod yurtim, go‘zal bir chaman,
• Yilining to‘rt fasli – yuksalish fasli.
• Tavof etib, ko‘zga surtsang arziydi
• Yantoqni gullatgan qumloqlarini.
• Hattoki behishtda topib bo‘lmaydi
• Tog‘, adir, dala-yu o‘tloqlarini.
• Men nechun tuprog‘in quchib suymayin,
• Taftida shodlanib urar yuragim.
• Iftixor yuksalar qalbda tinmayin:
• Shu muqaddas yurtga bordir keragim.
• Vatan sarhadida bitta g‘unchaman,
• Yuragim g‘ururdan ketadi jo‘shib.
• Bir lahzam so‘rasa Vatanim mendan,
• Jonimni beraman men unga qo‘shib...
• VATAN DESAM...
• Vatan desam jism-u jonda yoniq tuyg‘u,
• Qanot boylab, samolarga ketgum uchib.
• O‘zbekiston, bu dunyoda bittasan-ku,
• Men yashayman har giyohing mahkam quchib.
• Bobolarim hikmatlarin so‘zlab turar,
• Tarixlardan meros yuksak minorlaring.
• Menga o‘tmish-kelajakdan saboq berar
• Samolarga ustun bo‘lgan chinorlaring.
• Bahoringni kelinchak deb suyadirman,
• Yozing kelsa mevalaring elga tortiq.
• Kuz kelganda ajib hislar tuyadirman,
• Kumush qishing sevadirman chandon ortiq.
• Vatan, senda tug‘ilmoqlik o‘zi iqbol,
• Saodatdir shu Vatanda yashamoqlik.
• Faqat goho o‘z-o‘zimga bergum savol:
• Bizlar farzand bo‘loldikmi senga loyiq?..