Turkiyalik taniqli shoir, hikoyanavis va tarjimon Imdat Avshar 1967 yilda Qirshahardagi Qaman qishlog‘ida tug‘ilgan. O‘rta maktabni, Kirshahar oliy o‘quv yurtini bitirib, Firot universitetida o‘qidi. Maktablarda o‘qituvchilik qildi. 1997 yildan beri Qaysari shahar maorif mudirligida ishlamoqda. U maorif sohasidagi faoliyati bilan birga badiiy ijod bilan ham shug‘ullanadi. She’r, hikoya, maqola va tarjimalari bilan “Qardosh qalamlar”, “Ko‘kbayroq”, “Barjasta”, “Gumbetalti” kabi jurnallarda faol qatnashadi. Uning “Guli so‘lg‘in kengliklar” (2009), “Sovuq tush” (2012), “Onamning soati” (2012) kabi hikoyalar to‘plami, “Avliy Chalabiyning izidan” (2012) sayohatnomasi bosilgan. Shuningdek, u Rasul Rizo, Anor, Elchin, Mammad Ismoil kabi Ozarbayjon shoir va yozuvchilarining kitoblarini ham turkchaga tarjima qilib, nashr ettirgan. U turkiy tillardan qilgan tarjimalari uchun Baxtiyor Vahobzoda nomli mukofotga sazovor bo‘lgan. Muallifning asarlari Ozarbayjon, Qrim, Afg‘oniston, Boshqirdiston, Qirg‘iziston kabi o‘lkalar matbuotida ham yoritib kelinmoqda. Imdat Avshar Evrosiyo Yozuvchilar uyushmasi va Ozarbayjon Yozuvchilar uyushmasi a’zosidir.