1960 yilning 1 iyulida Xorazm viloyati Qo'shko'pir tumanida tug'ilgan. ToshDUning o'zbek filologiyasi fakultetini imtiyozli diplom bilan tamomlagan. O'zFAning Til va adabiyot institutida ilmiy xodim, TDSI "O'zbek tili va adabiyoti" kafedrasi mudiri, O'zbekiston Milliy teleradiokompaniyasining "Ma'rifat" studiyasida "Yog'du" bo'limi boshlig'i, O'zMU jurnalistika fakultetining "Televideniye va radioeshittirishlar" kafedrasi mudiri, Toshkent Davlat Madaniyat institutining "O'zbek va jahon tillari" kafedrasi dotsenti, O'zbekiston Respublikasi IIV Jazoni ijro etish Bosh boshqarmasining nashri "Vaqt-vremya" gazetasida muxbir vazifalarida ishlagan.

Shuningdek, "Alifbo saboqlari", "G'azal bo'stoni", "Sirli sandiq", "Muqallidlik maydonida", "Iqtidor" nomli intellektual-televizion musobaqaviy dasturlarning muallifi va boshlovchisi sifatida faoliyat ko'rsatgan.

Hozirda Toshkent viloyati XTXQTMOIda "Til va adabiyot ta'limi", O'zDSMI "Sahna nutqi" kafedralarining dotsenti lavozimlarida faoliyat yuritmoqda. U O'zFA mukofotining laureati va "Eng yaxshi voiz" Respublika ko'rik-tanlovining sovrindori, filologiya fanlari nomzodi, "Antik dunyo" Xalqaro fanlar akademiyasining akademigi.

R.Jumaniyozovning "Xalq dahosining ko'zgusi", "Eski o'zbek yozuvi", "Xalq ijodi - haq ijod", "Harflar tilga kirganda", "Dong qozongan doston", "Turkiy savod", "Harflar gulshani", "G'oyaviy tarbiyada notiqlik san'ati", "Komiljon Otaniyozov zamondoshlari xotirasida", "Yangiliklar yozish va tahrir qilish", "El sevgan baxshi", "Nutqiy mahorat", "Ta'lim, tarbiya, tafakkur, taraqqiyot", "Dil - qulf, til - kalit" nomli kitoblari va 300 ga yaqin ilmiy-ommabop maqolalari chop etilgan.