Endi Siz sotib olgan kitoblaringizni yuklab olishingiz shart emas!
E'tibor bering: hozirda bizning saytimizda sotib olingan elektron kitoblar uchta usulda o'qilishi mumkin:
mobil-ilova orqali, Windows-ilovasi orqali va saytdagi onlayn-o'quvchi orqali. Батафсил -->

Zarifboy Ibodullayev

Zarifboy Ibodullayev

 

Toshkent tibbiyot akademiyasi asab kasalliklari kafedrasi professori, tibbiyot fanlari doktori Zarifboy Ibodullaev 1965 yil 19 yanvarda Xorazm viloyatining Xazorasp tumanida o‘qituvchi oilasida tavallud topgan. U 1982 yili Toshkent Davlat tibbiyot institutining davolash fakultetiga o‘qishga kirdi. Ushbu institutni 1988 yili “Davolash ishi” yo‘nalishi bo‘yicha tugatib akademik Nabi Majidov tavsiyasiga ko‘ra ToshDavTI asab kasalliklari kafedrasida qoldiriladi. 1989 yili ushbu kafedraning o‘quv-ilmiy laboratoriyasiga mudir etib tayinlanadi. 1991 yili 2-Toshkent Davlat tibbiyot institutining asab kasalliklari kafedrasiga assistent lavozimiga ishga qabul qilinadi. Z.R. Ibodullaev 1994 yili prof. M.M. Asadullaev ilmiy rahbarligida “Kliniko-neyrofiziologicheskie osobennosti doinsultnix form serebrovaskulyarnix zabolevaniy pri insulinnezavisimom saxarnom diabete” mavzusida nomzodlik dissertasiyasini muvaffaqiyatli yoqlaydi. Yosh olim 1995 yili asab kasalliklari kafedrasining dosenti lavozimiga ishga qabul qilinadi. 1997-2000 yillari yangi tashkil etilgan “Tibbiyot psixologiyasi” kursiga mudir etib tayinlanadi. Bu davrda u tibbiyot psixologiyasi bo‘yicha o‘quv-uslubiy qo‘llanmalar, dasturlar va darslik yaratishga kirishadi. Z.R. Ibodullaev muallifligida 2008 yili tayyorlangan “Tibbiyot psixologiyasi” darsligi “Yilning eng yaxshi darsligi” sovriniga sazovor bo‘ladi va 3 marotaba nashrdan chiqadi.

Z.R. Ibodullaev 2005 yili «Mejpolusharnaya funksionalnaya asimmetriya i neyropsixologicheskie sindromi pri serebralnix insultax, puti ix korreksiy» mavzusida doktorlik dissertasiyasini muvaffaqiyatli yoqlaydi. Uning doktorlik dissertasiyasida ilgari surgan 2 ta yirik konsepsiyasi, ya’ni ambidekstlarda insult modeli va miyaning psixologik himoya konsepsiyasi xorijlik olimlarda katta qiziqish uyg‘otadi.

2006 yili prof. Z.R. Ibodullaev Toshkent tibbiyot akdemiyasining ilmiy bo‘limi boshlig‘i etib tayinlanadi. Professor Z.R. Ibodullaev 100 dan oshiq ilmiy asarlar muallifi. Uning ilmiy rahbarligida nevrologiya, neyropsixologiya va tibbiy psixologiya yo‘nalishlari bo‘yicha dissertasiya ishlari tayyorlangan va tayyorlanmoqda. Z.R. Ibodullaev muallifligida “Asab kasalliklari” darsligi va vrachlar uchun “Insult va koma” qo‘llanmasi nashrdan chiqdi. Z.R. Ibodullaev Respublikamizda “Tibbiyot psixologiyasi” ni o‘qitish bo‘yicha salmoqli ishlarni qilib kelmoqda. Uning rahbarligida ushbu fanni o‘qitish konsepsiyasi ishlab chiqildi va Davlat ta’lim standarti tuzildi.
Z.R. Ibodullaevning sog‘liqni saqlash tizimidagi mehnatlari munosib taqdirlanib 2014 yili “O‘zbekiston Respublikasi Sog‘liqni saqlash a’lochisi” unvoniga sazovor bo‘ldi.
Z.R. Ibodullaev mohir pedagog va amaliyotchi olim. Prof. Z.R. Ibodullaev “Nevrologiya” hamda “Psixologiya” jurnallari tahririyati a’zosi hamdir. Hozirda olim Asab kasalliklari kafedrasi professori va “Tibbiy psixologiya” bo‘yicha magistratura direktori lavozimida faoliyat ko‘rsatmoqda. Z.R. Ibodullaev 3 nafar farzandni tarbiyalab voyaga etkazmoqda.