Mualliflar

Mo‘minova Zulfiya Mardanovna 1959 yilda Samarqand viloyatining Narpay tumanida tug‘ilgan.1966 – 1976 yillarda o‘rta maktabda, 1976 yildan Kattaqo‘rg‘on shahar pedagogika kollejida o‘qigan. Shundan so‘ng (ToshDU) Mirzo Ulug‘bek nomidagi Milliy universitetni tamomlagan.1980 yillarda o‘zbek adabiyotiga kirib kelgan. “Vatan tashlab ketmaydi”, “Beshiklarni asragin dunyo”, “Yonayotgan ayol” (1992 yil), “Istiqlol oltin gulim” (1998 yil), “Samoga sochilgan yulduzlar” (2000 yil), “Qudratli yurtimga”, “Nikoh shartnomasi” (2004 yil), “Birinchi o‘qituvchim” (2008 yil), “Ayolga baxt bering” (2011 yil), “Bir kun dars qoldirgan bir umr pushaymondir” (2012 yil) kitoblar muallifi.“Saodat” jurnalida, “Sport” gazetasida bo‘lim boshlig‘i, Sergeli tumani hokimiyatida, Respublika Hotin-qizlar qo‘mitasida mas’ul lavozimlarda ishlab kelgan.2007 yildan Oliy va o‘rta maxsus ta’lim vazirligi “Ta’lim muammolari” jurnali bosh muharriri lavozimida ishlab kelmoqda.“Do‘stlik” ordeni, “Mustaqillikning 10 yilligi va 20 yilligi” nishonlari sohibasi.

Ozod MO‘’MIN XO‘JA (Mo‘minov Ozod Po‘latovich) 12 noyabr 1952 yil Toshkentda tug‘ilgan. 1970 yil 169-maktabni tugatgan. Shu yili Toshkent Davlat Universiteti fizika fakultetiga o‘qishga kirgan. 1975 yili oliy ma’lumot olib VNIIPromgazning O‘rta Osiyo filialida injenerlik faoliyatini boshladi. 1980 yildan to 1990 yilgacha O‘zbekiston Fanlar Akademiyasi Fizika-Texnika ilmiy-tekshirish institutiga o‘tib, ilmiy xodim sifatida faoliyat olib bordi. Tadqiqotlari asosida fizika-matematika fanlari nomzodi dissertasiyasini yoqladi. Katta iqtisodiy foyda keltiruvchi ixtirolari uchun “Sovet Ittifoqi ixtirochisi” medaliga sazovor bo‘ldi. Shu yillar davomida adabiyotga qiziqib fantastik hikoyalar bita boshladi. 1987 yilda “Xiyobondagi uch uchrashuv” fantastik hikoyalar to‘plami, 1989 yilda “Men – robot” kitobi, 1990 yilda “Eng dono ot” kitobi (tarjima asar) bosmadan chiqdi. Shu yillarda uning ayrim asarlari Rossiya, Ukraina va Qozog‘iston matbuotida tarjima qilinib nashr etildi. 1992 yilda “Buyuk Amir Temurning yoquti” tarixiy asari “Sharq yulduzi” jurnalida va 1993 yili alohida to‘plamda chop etildi. 1997 yilda “Bir yigit va uch qiz hangomasi” hajviy hikoyalari to‘plami bosmadan chiqdi. 2004 yilda “Sardor “Beshagachskiy” – toza o‘g‘ri” kriminal qissasi kitob holida chop etildi. 2006 yilda “Vahdat ul-haqoyiq” falsafiy traktati alohida kitob bo‘lib chiqdi. 2007 yilda O‘zbek adabiyotidagi birinchi kriminal trillerni chop etdi. Bu asar ““Oyjamol” choyxonasi” deb nomlangan. 2006 yildan O‘zbekiston tarixidagi noyob xislatli insonlar hayotiga qiziqib, ularni o‘rgana boshlagan va 2008 yilda buyuk Bahouddin Naqshbandning ustozi haqida “Hazrat Sayid Amir Kulol” nomli tarixiy voqeanomalar asarini yozib tugatdi. 2010 yilda boshqa bir buxorolik noyob inson haqida “Xo‘ja Muhammad Parron” deb nomlangan tarixiy voqeanomalar asarini bitdi. Bu asarlar 2012 yilda chop etildi. 2015 – 2019 yillarda “Buyuk Amir Temur yoquti” (tarixiy va fantastik asarlar to‘plami), “Koinot oqimlari” (fantastik roman, Ayzek Azimovdan tarjima),“Bir tomchi rahmat” (Abulhasan Haraqoniy haqida), “Mukofot va qasos” (falsafiy risola), “Shayx Zayniddin – olim va valiy” (tarixiy qissa) va “Men bilaman, sevaman seni” (she’riy to‘plam) kitoblari chop etildi. Ozod Mo‘’min Xo‘ja 1991 yil O‘zbekiston Yozuvchilari uyushmasiga a’zo bo‘lgan.

Пўлат Мўмин (1922-2004) 1922 йил 24 декабрда Тошкент шаҳрида туғилган – Ўзбекистон халқ ёзувчиси (1992). “Эл-юрт ҳурмати” ордени билан мукофатланган (1988), Хизмат кўрсатган санъат арбоби (1983). Дастлаб педагогика билим юртини (1939), сўнг Низомий номидаги Тошкент педагогика иниститутини тугатиб (1944), ўқитувчилик билан шуғулланган (1944-1947). “Ленин учқуни” газетасида адабий ходим (1948-1950), Ўзбекистон Давлат нашриётида бўлим мудири (1951-1952), Республика Ёзувчилар уюшмасида адабий маслаҳатчи (1954-1960), Маданият вазирлиги қошидаги Санъат ишлари бошқармасида драмтургия бўйича бош муҳаррир (1962-1964). Илк шеърлар тўплами “Сайранг қушлар (1949). Шундан кейин унинг “Тонг куйлари” (1949), “Олтин бошоқлар” (1951), “Тиш чўтка, порошок ва атир совун эртаги” (1955), “Ҳунардан унар” (1958), “Тўғри ўсган гул бўлар” (1960), “Ақл қаерда бўлар” (1962), “Олтин най” (1967), “Яхшиларга ўхшасам” (1968), “Раҳматга раҳмат!” (1969), “Эсон ва Омон” (1973), “Устозлар изидан” (1980), “Эртакдан эртакка” (1989), “Эртаклар яхшиликка етаклар” (1984), “Олтмиш олти олтин қўл”, “Буғдой бобо” (1995), “Болажон, болажоним” (2003) ва бошқа болаларга бағишланган шеър ва эртаклардан иборат тўпламлари, “Дружно шагаем”, “От радости растем”, “Яблоко на всех” каби рус тилидаги шеърий тўпламларини яратган. “Кулди хиёл” (1964), “Гул ва пиёз”, “Мен севаман, сен севасанми? ”, “Гул берди, кўнгил берди”, “Қўшиқ айтиб” (1983),“Юрак завқу дардларим, айтар байту фардларим” (1993), “Бағишловлар-олқишловлар” (2003), “Фурсат ғанимат” (вафотидан сўнг - 2013) каби катталарга бағишланган шеър ва қўшиқлардан иборат тўпламлари мавжуд. Болалар драммтурги сифатида “Қовоқвой билан Чаноқвой”,“ Суқатой Конфетвой”, “Она болам дейди, бола онам дейди” (1987), “Туяқуш-бояқиш” cингари эртак-пессалари Республика театрларида саҳналаштирилган. А.С. Пушкин, В.В. Маяковский, С. Маршак, С. Михалков, А. Бартов ва бошқа рус ёзувчиларининг болаларга бағишланган шеър ва эртакларини, шунингдек, Николай Носовнинг "Билмасвой билан дўстларининг бошидан кечирганлари", "Билмасвой қуёш шаҳрида"(1987) эртак романини ўзбек тилига таржима қилган…