Mualliflar

Zohir A’LAM 1943 yili Toshkentda tug‘ilgan. Maktabni tugatgach, kunduzlari Toshkent traktor zavodida ishlab, kechqurunlari Toshkent Davlat Universitetida tahsil oladi. "O‘zbekiston" nashriyotida, "Sharq yulduzi" jurnalida faoliyat ko‘rsatgan. "Baxtli bilet" nomli kitobi 1972 yilda, "BAM ufuqlari" nomli ocherk va hikoyalar majmuasi, "Muqaddima" qissasi 1978 yilda yaratildi. 1981 yilda "Kiyik ko‘zi" hikoyalar to‘plami, 1987 yilda "Afandining qirq bir pashshasi" nomli qissasi, "Buxorodagi birinchi namoz", "Ota o‘gitlari", "Zarb" kabi asarlari nashr qilingan. U tarjimon sifatida ham ko‘plab asarlarni o‘zbek tiliga tarjima qilgan. Bular orasida S. Zaliginning "Komissiya" romani ajralib turadi. "Afandining qirq bir pashshasi" asari o‘zbek, rus, bolgar tillarida sahnalashtirilgan va uning asosida badiiy film ham ishlangan, shuningdek mazkur asar maktab darsliklaridan ham joy olgan.

Hasan Po‘latov, 1946 yilda Farg‘ona viloyati Beshariq tumanida tug‘ilgan. 1967 yilda Samarqand davlat universitetining tarix fakultetini tugatgan, tarixchi. 1973 yilda Leningrad (xozirgi Sankt-Peterburg) davlat universiteti falsafa fakultetining ilmiy kengashida nomzodlik dissertasiyasini yoqlagan, dosent unvoniga ega. Ilmiy izlanishlari falsafa tarixi, mehnatning ijtimoiy muammolari, tasavvuf ta’limoti tarixi masalalariga bag‘ishlangan. “Qishloq xo‘jaligi mehnatining industrial mehnatni bir turiga aylanishi”, “Tasavvuf tarixidan lavhalar” nomli monografiyalar, bir nechta siyosatshunoslik, falsafa tarixiga doir ilmiy uslubiy qo‘llanmalar (hammualliflikda) hamda ellikka yaqin maqolalar muallifi. Ilmiy pedagogik faoliyati 1967 yildan buyon Farg‘ona davlat universiteti bilan bog‘liq.