Муаллифлар

Дадахон Нурий аслида ҳиндий тили бўйича мутахассис. Тошкентдаги мусиқа билим юртида ўқиб юрган пайтларидаёқ машҳур рассом Ч. Аҳмаров, Ю. Елиназаров, А. Абдуллаевлар назарига тушиб, улардан тасвирий санъат сабоқларини олган. Дастлабки ижод намуналарини ўқиган Абдулла Қаҳҳор “Сиз адабиёт билан кўпроқ шуғулланинг”, — дея, “Бегона” қиссасига “оқ йўл” ёзиб беради. Шундан бери адиб буюк устоз олдидаги бурчини сидқидилдан адо этиб келмоқда. Айниқса, у ёшлар орасида катта қизиқиш уйғотган қатор лирик қиссалари; академик М. Қўшжонов “Гоголона” дея баҳо берган “Подшоҳимнинг кўнгилхушлиги”, “Акахоним — Бош вазир” бадиа-эссе китоблар; пойтахт Тошкентнинг экологик ҳамда дендрологик муаммоларига бағишланган, шунингдек Бўстонлиқ ҳақидаги: “Дунёни титратиб турган СССР деган мамлакат Ҳарбий Вазири билан олишиб, қутурган буқанинг думига челак боғланишига сабаб бўлган” (О. Шарофиддинов) кўпдан-кўп “жанговар” публицистик мақолалар муаллифидир. Адибнинг Ҳиндистон, Покистон, Шри-Ланка мамлакатлари бўйлаб қилган саёҳатлари ҳақида “Сафарнома” мавзуидаги китоблари, “Осмон устуни”, “Шаҳар тегирмони”, “Қулатилган чинорлар паноҳи”, “Ниқобсиз Америка ва бошқа манзилгоҳлар” (Қиёмат қўнғироқлари), “Олисдаги дала-боғ” сингари бадиий ҳамда маърифий-ахлоқий романлари ўқувчилар томонидан қизиқиб мутоала қилинмоқда. Асарлари ҳиндий, урду, инглиз, қозоқ, рус, корейс ва турк тилларига таржима қилинган...

Рустам Нуриддинов 1953 йилда Андижон вилояти Шаҳрихон туманида таваллуд топган. 1976 йилда Тошкент Давлат Университети (ЎзМУ) кимё факультетини тамомлаган. 1979 – 1995 йиллар давомида Латвия ФА Органик синтез институтида тиббиёт кимёси йўналишида илмий фаолият олиб борган. Кимё фанлари доктори, профессор. Кўплаб илмий мақолалар, патентлар ва бир нечта оригинал препаратлар муаллифи. Саратонни даволаш учун мўлжалланган “Тибет эликсири” дори воситасининг муаллифларидан бири. Ҳозирда Тошкент шаҳрида истиқомат қилади ва Латвия Органик синтез институтининг Ўзбекистондаги расмий вакили сифатида фаолият олиб боради.

Нугманова Аропат Абдухамитовна – Тошкент Давлат пелагогика университети “Табиий фанлар” факультети “География ўқитиш методикаси” кафедрасининг ўқитувчиси. А.А. Нугманова География жамияти аъзоси. Ҳозирда 20 дан ортиқ илмий мақола, 1 та услубий қўлланма ва ўқув- услубий мажмуаларнинг муаллифи.