Qadrli o‘quvchilar! Nashriyotimiz siz azizlarga 10 jilddan tashkil topgan «Jahon bolalar adabiyoti» seriyasini taqdim etadi. Kitoblar jahon bolalar adabiyoti yozuvchi va shoirlarining ertak, hikoya, she’r va boshqa ko‘plab janrdagi asarlarni o‘z ichiga qamrab olgan. Ushbu to‘rtinchi jildda siz Turkiya, Eron bolalar adabiyoti bilan yaqindan tanishasiz…

Tavfiq Fikrat hayoti va ijodiy faoliyati bilan tanishmoqchi bo‘lgan kishining oldida Turkiyada XIX asr oxiri, XX asr boshlarida yuz bergan ayrim jarayonlar bilan tanishishga ehtiyoj bo‘ladi.

XIX asrning o‘rtalarigacha faqat Turkiyada emas, butun turkiy she’riyatda aruz vazni hukmron edi. Gap faqat vaznda emas, butun she'riyat forsiy va arabiy so‘zlar, iboralar bilan shu qadar to‘lib ketgan ediki, uni o‘qigan oddiy xalq gap nima haqda ketayotganini anglamaydigan bo‘lib qolgan edi. Hatto, eng demokratik, eng xalqchil g‘oyalar ham forsiy-arabiy so‘zlar qurshovida bo‘lgani uchun keng ommaga yetib bormas edi. Faqat adabiyotda emas, fanda, aniq ilmlarda ham shu holat hukmron edi. Buni to‘la anglab etgan turk ziyolilari avvalo barcha yangi zamonaviy fanlarni egallash va uni xalqqa yetkazishning samarali yo‘llarini izlay boshladilar. Ko‘plab turk ziyolilari Fransiyaga, Angliya, Germaniyaga borib, u yerlardagi madaniy jarayonlarni o‘rganib kela boshladilar. Ilmiy darsliklarni yangiliklar va xalq tili bilan boyitish zarurligi yaqqol ko‘zga tashlanardi.

Madaniyatda, adabiyotda islohotlar qilishga kirishildi. XIX asrning ikkinchi yarmida bu masala davlat siyosatiga aylandi…