O‘zbek mumtoz musiqasi o‘quv qo‘llanmasi musiqa va san’at kollejlari hamda akademik litseylar tizimidagi an’anaviy ijrochilik bo‘limlari o‘quvchilari uchun mo‘ljallangan bo‘lib, unda o‘zbek xalqining boy merosi bo‘lmish mumtoz musiqasi janrlari haqida ma’lumot beriladi. Ko‘p asrlar davomida sozandayu xonandalar va baslakorlar tomonidan ijro etib kelinayotgan mumtoz musiqa namunalari — ashula, katta ashula, dostonlar va maqomlar — avloddan avlodga, ustozdan shogirdga o‘tib, saqlanib, sayqal topib hozirgi kungacha rivoj olib kelmoqda. Mazkur qo‘llanmada mumtoz musiqaning har bir janri mavqei, mazmuni, shakli va ijro uslublari ma’lum darajada yoritilib beriladi.

• Kirish
• O‘zbek mumtoz musiqasi va uning xususiyatlari
• Mumtoz musiqa janrlari tasnifi
• O‘zbek mumtoz cholg‘u musiqasi
• Mumtoz yalla va ashula janrlari
• Katta ashula
• O‘zbek dostonlari
• O‘zbek maqomlari
• Shashmaqom
• Shashmaqomning cholg‘u bo‘limi
• Shashmaqomning ashula bo‘limi
• Xorazm maqomlari
• Farg‘ona-Toshkent maqomlari
• «Shashmaqom» tarkibidagi maqomlar xususida
• Buzruk maqomi
• Rost maqomi
• Navo maqomi
• Dugoh maqomi
• Segoh maqomi
• Iraq maqomi
• Maqom ijrochiligi uslublari
• Xulosa
• Adabiyotlar
• Notografiya
• Diskografiya

O‘ZBEK MUMTOZ MUSIQASI VA UNING XUSUSIYATLARI

O‘zbek xalqining musiqa madaniyati ko‘p asrlik tarixga ega bo‘lib, u ko‘pchilik sozanda va xonandalar avlodining faoliyatida qaror topgan an’anaviy musiqa san’ati ekanligi haqida guvohlik beradi. An’anaviy musiqa — bu badiiy jarayon bo‘lib, unga xalq tomonidan yaratilgan, asrlar osha bizgacha yetib kelgan xalq musiqa ijodi yoki musiqa folklori va yetuk sozanda-bastakorlar tomonidan ijod etilgan mumtoz musiqasi kiradi. Bu ijodiyot namunalari og‘zaki an’anada saqlanib, sayqal topib, barkamol musiqa asari sifatida rivojlanib kelmoqda.

O‘zbek mumtoz musiqasi o‘tmishdan o‘zining teran ma’noga ega ekanligi, murakkabu mukammalligi va beqiyos an’analarni o‘zida mujassam etganligi bilan o‘zga xalqlar musiqasidan ajralib turadi. Ushbu musiqa ijodiyotida xalqimizning o‘tmish an’analari, boy va teran ma’nolarga asoslangan tarixi muhrlangan. Ularning har bir namunasi tarixdan bir sadodir. Binobarin, ularni qanchalik o‘rganmaylik, qanchalik sirlaridan voqif bo‘lmaylik, shunchalik yangi qirralari ochilib, o‘zining benazir xususiyatlarini namoyon etadi. Shu nuqtai nazardan o‘zbek mumtoz musiqasini o‘rganish, ularda mujassam etilgan falsafiy g‘oyalarni anglash, tarix sadolarini uqib olish, ularning siru sinoatlarini idrok etish uchun bugungi kunda imkoniyatlar yetarli…